ਨਵੀਂ ਦਿੱਲੀ: ਭਾਰਤ ਵਿੱਚ ਕਾਗਜ਼ੀ ਕਰੰਸੀ ਦੀ ਥਾਂ ਪੋਲੀਮਰ (ਪਲਾਸਟਿਕ) ਨੋਟਾਂ ਦੀ ਸੰਭਾਵਨਾ ਨੂੰ ਪਰਖਣ ਲਈ ਸਰਕਾਰ ਨੇ ਵੱਡਾ ਕਦਮ ਚੁੱਕਿਆ ਹੈ। ₹10 ਅਤੇ ₹20 ਦੇ ਪੋਲੀਮਰ ਨੋਟਾਂ ਦਾ ਫੀਲਡ ਟ੍ਰਾਇਲ ਕਰਨ ਦੀ ਮਨਜ਼ੂਰੀ ਦਿੱਤੀ ਗਈ ਹੈ।
ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਣ ਨੇ ਰਾਜ ਸਭਾ ਵਿੱਚ ਲਿਖਤੀ ਜਵਾਬ ਦਿੰਦਿਆਂ ਦੱਸਿਆ ਕਿ ਫੀਲਡ ਟ੍ਰਾਇਲ ਲਈ ₹10 ਅਤੇ ₹20 ਮੁੱਲ ਦੇ 100-100 ਕਰੋੜ ਪੋਲੀਮਰ ਨੋਟ, ਯਾਨੀ ਕੁੱਲ 200 ਕਰੋੜ ਨੋਟ ਛਾਪਣ ਦੀ ਮਨਜ਼ੂਰੀ ਦਿੱਤੀ ਗਈ ਹੈ।
RBI ਦੇ ਪ੍ਰਸਤਾਵ ਤੋਂ ਬਾਅਦ ਲਿਆ ਗਿਆ ਫੈਸਲਾ
ਵਿੱਤ ਮੰਤਰੀ ਮੁਤਾਬਕ ਭਾਰਤੀ ਰਿਜ਼ਰਵ ਬੈਂਕ ਦੇ ਕੇਂਦਰੀ ਬੋਰਡ ਦੀ ਸਿਫ਼ਾਰਸ਼ ਤੋਂ ਬਾਅਦ ਸਰਕਾਰ ਨੂੰ ਇਸ ਸਬੰਧੀ ਪ੍ਰਸਤਾਵ ਭੇਜਿਆ ਗਿਆ ਸੀ। ਇਹ ਪ੍ਰਸਤਾਵ RBI Act, 1934 ਦੀ ਧਾਰਾ 25 ਤਹਿਤ ਰੱਖਿਆ ਗਿਆ ਸੀ।
ਇਸ ਫੀਲਡ ਟ੍ਰਾਇਲ ਦਾ ਮਕਸਦ ਪੋਲੀਮਰ ਨੋਟਾਂ ਦੀ ਵਰਤੋਂ ਅਤੇ ਉਨ੍ਹਾਂ ਦੀ ਕਾਰਗੁਜ਼ਾਰੀ ਨੂੰ ਪਰਖਣਾ ਹੈ। ਪਲਾਸਟਿਕ ਨੋਟ ਆਮ ਕਾਗਜ਼ੀ ਨੋਟਾਂ ਦੇ ਮੁਕਾਬਲੇ ਵਧੇਰੇ ਟਿਕਾਊ ਹੋਣ ਦੇ ਨਾਲ ਪਾਣੀ ਅਤੇ ਨਮੀ ਵਰਗੀਆਂ ਸਥਿਤੀਆਂ ਵਿੱਚ ਵੀ ਬਿਹਤਰ ਰਹਿਣ ਦੀ ਉਮੀਦ ਕੀਤੀ ਜਾਂਦੀ ਹੈ।
ਕੀ ਭਵਿੱਖ ਵਿੱਚ ਪੂਰੀ ਤਰ੍ਹਾਂ ਬਦਲ ਜਾਣਗੇ ਨੋਟ?
ਫਿਲਹਾਲ ਇਸ ਨੂੰ ਸਿਰਫ਼ ਫੀਲਡ ਟ੍ਰਾਇਲ ਵਜੋਂ ਦੇਖਿਆ ਜਾ ਰਿਹਾ ਹੈ। ਜੇਕਰ ਟ੍ਰਾਇਲ ਸਫਲ ਰਹਿੰਦਾ ਹੈ ਤਾਂ ਭਵਿੱਖ ਵਿੱਚ ₹10 ਅਤੇ ₹20 ਦੇ ਪੋਲੀਮਰ ਨੋਟ ਨਿਯਮਿਤ ਤੌਰ &rsquoਤੇ ਜਾਰੀ ਕਰਨ ਬਾਰੇ ਫੈਸਲਾ ਲਿਆ ਜਾ ਸਕਦਾ ਹੈ।
ਇਸ ਲਈ ਫਿਲਹਾਲ ਇਹ ਨਹੀਂ ਕਿਹਾ ਜਾ ਸਕਦਾ ਕਿ ਦੇਸ਼ ਵਿੱਚ ਸਾਰੇ ਕਾਗਜ਼ੀ ਨੋਟਾਂ ਨੂੰ ਤੁਰੰਤ ਪਲਾਸਟਿਕ ਨੋਟਾਂ ਨਾਲ ਬਦਲਿਆ ਜਾ ਰਿਹਾ ਹੈ।
